ភ្នំពេញ៖ អគ្គនាយកនៃអគ្គនាយកដ្ឋានស្រាវជ្រាវ-ចារកិច្ច ក្រសួងការពារជាតិ លោកឧត្តមសេនីយ៍ឯក ហ៊ុន ម៉ានិត បានដឹកនាំ កិច្ចប្រជុំចារកិច្ចយោធាអាស៊ាន ខណៈនាយលេខាធិការដ្ឋានសេនាធិការចម្រុះ លោកឧត្តមសេនីយ៍ទោ ប៉ែន សុក្រឹតវិទ្យា បានដឹកនាំ
កិច្ចប្រជុំប្រតិបត្តិការយោធាអាស៊ាន ដើម្បីត្រៀមរកកិច្ចប្រជុំប្រជុំរដ្ឋមន្រ្តីការពារជាតិអាស៊ាននាខាងមុខនាទីស្តីក្រសួងការពារជាតិ។
កិច្ចប្រជុំនេះធ្វើឡើងចាប់តាំងពីថ្ងៃទី១៤ រហូតដល់ថ្ងៃទី១៥ ខែមីនា ឆ្នាំ២០២២នេះ ដោយមានការចូលរួមពីបណ្ដាប្រទេសជាសមាជិកអាស៊ានទាំង១០ប្រទេសផងដែរ។ កិច្ចប្រជុំនេះកងយោធពលខេមរភូមិន្ទបានជ្រើសរើសប្រធានបទ «សាមគ្គីភាពដើម្បីសន្តិសុខ សុខដុមរមនា» ដើម្បីផ្លាស់ប្តូរទស្សនៈគ្នាទៅវិញទៅមក។
បើតាមលោក ប៉ែន សុក្រឹតវិទ្យា ការជ្រើសយកប្រធានបទនេះគឺជាឆន្ទៈ និងបំណងប្រាថ្នារបស់កម្ពុជាក្នុងការជំរុញកិច្ចសហប្រតិបត្តិ ក្នុងចំណោមរដ្ឋសមាជិកអាស៊ាន ដោះស្រាយ និងឆ្លើយតបទៅនឹងបញ្ហាសន្តិសុខសំខាន់ៗនៅក្នុងតំបន់ ក្នុងគោលបំណងបំផុសគំនិត និងលើកទឹកចិត្តដល់រដ្ឋសមាជិកអាស៊ានទាំងអស់ដោះស្រាយបញ្ហាប្រឈមមុខដែលកំពុងការគំរាមកំហែង ជាពិសេសនៅក្នុងកាលៈទេសៈដែលមានហានិភ័យខ្ពស់ ដូចជាជំងឺរាតត្បាតកូវីដ-១៩។
លោកថា៖ «គោលបំណងចម្បងនៃប្រធានបទនេះ គឺដើម្បីបង្កើនឱកាសសម្រាប់សន្តិភាព និងស្ថិរភាពដែលអាចទទួលយកបានសម្រាប់ទាំងអស់គ្នា។ គោលបំណងមួយទៀត គឺថាដំណោះស្រាយណាមួយចំពោះបញ្ហាក្នុងតំបន់ក៏នឹងផ្តល់នូវលទ្ធផលជាប្រយោជន៍សម្រាប់ប្រទេសនីមួយៗ និងតំបន់ទាំងមូលផងដែរ។ ម្យ៉ាងវិញទៀត គំនិតចម្បងនៃប្រធានបទនេះ គឺដើម្បីជៀសវាងការអាត្មានិយម និងការកេងប្រវ័ញ្ចគ្នាទៅវិញទៅមកនៅក្នុងតំបន់ នៅខណៈពេលប្រឈមមុខនឹងកាលៈទេសៈផ្សេងៗ»។
កិច្ចប្រជុំចារកិច្ចយោធាអាស៊ានលើកទី១៩ និងកិច្ចប្រជុំប្រតិបត្តិការយោធាអាស៊ានលើកទី១២ គឺជាកិច្ចប្រជុំជំនាញពីរ ទទួលខុសត្រូវក្នុងការរៀបចំឯកសារសម្រាប់បម្រើកិច្ចប្រជុំអគ្គមេបញ្ជាការកងទ័ពអាស៊ានលើកទី១៩ (ACDFM-19) ដែលគ្រោងនឹងបើកកិច្ចប្រជុំនៅថ្ងៃទី១៧ ខែមីនា ឆ្នាំ២០២២ ខាងមុខនេះ៕